Job 9

Mĩario ya Ayubu

1Ningĩ Ayubu agĩcookia, akiuga atĩrĩ:

2 ^a“Ti-itherũ nĩnjũũĩ ũhoro ũcio nĩ wa ma.
No rĩrĩ, mũndũ angĩhota atĩa gũkorwo arĩ mũthingu mbere ya Mũrungu?
3O na korwo mũndũ enda gũkararania na Ngai-rĩ,
ndangĩhota kũmũcookeria kĩũria o na kĩmwe harĩ ciũria ngiri.
4 ^bŨũgĩ wake nĩ mũingĩ mũno, na ũhoti wake nĩ mũnene.
Nũũ wanaregana nake akĩgaacĩra?
5 ^cEeheragia irĩma itekũmenya,
na agacingʼaũrania nĩ kũrakara.
6 ^dAthingithagia thĩ ĩkoima handũ hayo,
na akainainia itugĩ ciayo.
7 ^eAathaga riũa rĩkaaga kũratha;
nake agiragĩrĩria ũtheri wa njata.
8 ^fNĩwe watambũrũkirie igũrũ arĩ o wiki,
na athiiaga agĩkinyangaga makũmbĩ ma iria.
9Nĩwe Mũũmbi wa njata iria ciĩtagwo Nduba, na Karaũ,
na Kĩrĩmĩra, o na ikundi cia njata cia mwena wa gũthini.
10 ^gNĩekaga magegania matangĩmenyeka,
na akaringa ciama itangĩtarĩka.
11 ^hRĩrĩa aahĩtũkĩra harĩa ndĩ, ndingĩmuona;
o na rĩrĩa aathiĩra harĩa ndĩ ndimenyaga.
12 ⁱAngĩgutha kĩndũ-rĩ, nũũ ũngĩhota kũmũgiria?
Nũũ ũngĩmũũria atĩrĩ, ‘Nĩ atĩa ũreka?’
13 ^jNgai ndahingagĩrĩria marakara make;
o na arĩa maateithagĩrĩria Rahabu nĩmamũinamagĩrĩra.

14“Niĩ-rĩ, ndaakĩhota atĩa kũmũkararia?
Ingĩruta kũ ciugo cia kũmũcookeria?
15 ^kO na korwo ndihĩtĩtie-rĩ, ndingĩhota kũmũcookeria ũndũ;
ũrĩa ingĩĩka no gũthaitha ingĩthaitha Mũnjiirithia anjiguĩre tha.
16O na ingĩamwĩtire nake anjĩtĩke-rĩ,
ndingĩĩtĩkia nĩangĩathikĩrĩirie.
17 ^lWe angĩamemendire na kĩhuhũkanio,
na aingĩhie ironda ciakwa hatarĩ gĩtũmi.
18Ndarekaga njookererwo nĩ mĩhũmũ,
no nĩahatagĩrĩria na mathĩĩna.
19Korwo no ũhoro wa hinya-rĩ, we arĩ hinya mũno!
Na korwo no ũhoro wa ciira wa kĩhooto-rĩ, nũũ ũngĩmwĩta?
20O na korwo ndiahĩtĩtie-rĩ, kanua gakwa no kandue mũhĩtia;
korwo ndiarĩ na ũcuuke-rĩ, nĩkangĩanduire mũhĩtia.

21 ^m“O na gũtuĩka ndirĩ na ũcuuke-rĩ, ndikwĩrĩrĩra;
muoyo wakwa nĩndĩwagĩire kĩene.
22 ⁿŨhoro no ũrĩa ũmwe; nĩkĩo ndĩroiga atĩrĩ,
‘Aniinaga arĩa matarĩ ũcuuke o na akaniina arĩa aaganu.’
23Hĩndĩ ĩrĩa ihũũra rĩarehe gĩkuũ kĩa narua,
nĩathekagĩrĩra kũũrwo nĩ hinya kwa arĩa matarĩ na mahĩtia.
24 ^oHĩndĩ ĩrĩa bũrũri wagĩa moko-inĩ ma andũ aaganu,
nĩahingaga aciirithania maitho.
Akorwo ti we-rĩ, nũũ wĩkaga ũguo?

25 ^p“Matukũ makwa marahanyũka gũkĩra mũkinyia-ũhoro;
mombũkaga matarĩ na gĩkeno o na kĩnini.
26 ^qMahĩtũkaga na ihenya mũno ta tũtarũ twa irura, ▼

▼Tũtarũ tũtaarĩ tũnene twa ithanjĩ twathondekagĩrwo Misiri.

kana ta nderi igũcuuhũkĩra kĩndũ gĩa kũrĩa.
27Ingiuga atĩrĩ, ‘Nĩngũriganĩrwo nĩ mateta makwa,
nĩngũtiga gũtukia gĩthiithi, ngene,’
28 ^sno ngeetigĩra mĩnyamaro yakwa yothe,
nĩgũkorwo nĩnjũũĩ ndũkandua atĩ ndiĩhĩtie.
29Kuona atĩ nĩndĩkĩtie gũtuuo mũhĩtia-rĩ,
nĩ kĩĩ gĩgũtũma ndĩĩnogie tũhũ?
30 ^tO na ingĩĩthamba na thabuni,
na ndĩĩthambe moko na igata-rĩ,
31no ũndikirie irima rĩa gĩcoro
nĩgeetha o na nguo ciakwa iithũũre.

32 ^u“We ti mũndũ ta niĩ atĩ nĩguo ndĩmũcookerie,
nĩguo tũngʼethanĩre igooti-inĩ.
33 ^vNaarĩ korwo nĩ harĩ mũndũ ũngĩtũiguithania,
atũigĩrĩre guoko gwake ithuĩ eerĩ,
34 ^wmũndũ wa kũnjehereria rũthanju rwa Ngai,
nĩgeetha ndigacooke kũmakio nĩ itebeebania rĩake.
35Hĩndĩ ĩyo nĩingĩacooka kwaragia itekũmwĩtigĩra,
no ũrĩa ndariĩ rĩu-rĩ, ndingĩhota.